စာအုပ်အညွှန်း – Targeted

ရွေးကောက်ပွဲကာလနီးလာတော့ နည်းပညာကိုရွေးကောက်ပွဲအတွက် ဘယ်လိုပေါင်းစပ်အသုံးပြု​ြကတယ်ဆိုတာကို ကွက်ကွက်ကွင်းကွင်းဖော်ပြထားတဲ့ “ ပစ်မှတ်” ဆိုတဲ့ စာအုပ်လေးကို Team Mr.Linuxer က​ေန စာအုပ်အညွှန်းအ​​ဖြစ် ညွှန်းဆိုချင်ပါတယ်။ ဒီစာအုပ်က The Great Hack ရုပ်ရှင်ထက် အများကြီးစိတ်ဝင်စားဖို့ ပိုကောင်းပါတယ်။ Cambridge Analytica ဆိုတာ ၂၀၁၆ အမေရိကန် ရွေးကောက်ပွဲမှာ ဒေါ်နယ်ထရန့်အတွက် ဝန်ဆောင်မှုပေးခဲ့တဲ့ ကုမ္ပဏီပေါ့။ အဲ့ဒီ ကုမ္ပဏီမှာ Data Scientist တွေ၊ စိတ်ပညာရှင်တွေ အဓိက ပါဝင်တယ်။ အဲ့ဒါကြောင့် ဘယ်သူ့ကို၊ ဘယ်အချိန်မှာ၊ ဘယ်လိုမဲဆွယ်စကားတွေပို့ရမယ်ဆိုတာကို သူတို့ကောင်းကောင်းသိတယ် တဲ့။

သမားရိုးကျမဲဆွယ်ကြော်ငြာတွေက လူတစ်ယောက်၊ အဖွဲ့အစည်းတစ်ခုရဲ့ အမှတ်တံဆိပ်ကို လူတွေရင်းနှီးအောင် လုပ်နိုင်တာကလွဲပြီး လူတွေရဲ့အပြုအမူကို မပြောင်းလဲနိုင်ဘူး။ ​အခုလက်ရှိမျိုးဆက်က ယေဘုယျအားလုံးကို ပစ်မှတ်ထားတဲ့ ကြော်ငြာတွေနဲ့ဆို မထိရောက်တော့ဘူး။ အဲ့ဒါကြောင့် Cambridge Analytica က Big Data ကို အသုံးပြုပြီး မဲဆန္ဒရှင် ပြည်သူတွေကို ထရန့်ဘက် နဲ့ ဟီလာရီဘက် ဆိုပြီး အုပ်စုခွဲ၊ အဲ့ဒီ အုပ်စုတွေထဲကမှ စိတ်ပညာဆိုင်ရာ အသေးစိတ်အုပ်စုထပ်ခွဲတာတွေလုပ်၊ အဲ့ဒါပြီးတော့မှ အုပ်စုအပေါ်မူတည်ပြီး အသေးစိတ် ပစ်မှတ်ထား မဲဆွယ်တာတွေ လုပ်တယ်။ အဓိကတော့ မဲ​ပေးဖို့ ဝေခွဲရခက်နေတဲ့သူတွေကို ထရန့်ဘက်ကို ​သေချာပေါက် မဲလာ​ေပးအောင်၊ ကြိုတင်မဲ​တွေပေးအောင်နဲ့ ဟီလာရီကို မဲသွားမပေးအောင် လုပ်တာပေါ့။

FB အသုံးပြုသူတစ်ဦးပြုလုပ်ခဲ့တဲ့ Like ၆၈ ခုကနေ အဲ့ဒီလူရဲ့ အကြောင်းအရာတွေကို ခန့်မှန်းနိုင်တယ်။ သူလုပ်ခဲ့တဲ့ Like အရေအတွက် များလေလေ လူတစ်ယောက်ရဲ့အကြောင်းကို သူကိုယ်တိုင်သိတာထက် ပိုသိရလေပဲ။ အွန်လိုင်းပေါ်ကနေ လူတစ်ယောက်ကို ထိထိရောက်ရောက် မဲဆွယ်နိုင်ဖို့ဆိုရင် မဲဆွယ်အကြောင်းအရာကို သူ့ဆီကို ၅ ကြိမ်ကနေ၊ ၇ ကြိမ် မြင်အောင် လုပ်ပေးရမယ်တဲ့။ အဲ့ဒါဆိုရင် သူ့အနေနဲ့ မဲဆွယ်ကြော်ငြာကို Click နှိပ်ကြည့်ဖို့ သေချာသလောက်ရှိပြီတဲ့။

ပြည်နယ်တစ်ခုစီ၊ နယ်မြေတစ်ခုစီ၊ မြို့တစ်မြို့စီမှာရှိတဲ့ အရေးပါတဲ့အကြောင်းအရာတွေအပေါ်မူတည်ပြီး အုပ်စုခွဲတာတွေလည်းလုပ်တယ်။ အဲ့ဒီအချက်အလက်တွေအပေါ်မူတည်ပြီး မဲဆွယ်ခရီးစဉ်မှာ ပြောရမယ့်အကြောင်းအရာတွေကို အစီအစဉ်တွေချမှတ်ပေးတယ်။ ပေါက်သွားတဲ့ မိန့်ခွန်းထဲက အချက်အလက်တွေကို ကြော်ငြာအဖြစ်ပြောင်းသုံးတယ်။ တကယ်လို့ မဲဆွယ်ကြော်ငြာတစ်ခုက မျှော်လင့်ထားသလို မအောင်မြင်ဘူးဆိုရင် အဲ့ဒီကြော်ငြာကို မူရင်းနေရာကနေ တခြားတစ်နေရာကိုရွှေ့လိုက်တာမျိုး၊ ဒါမှမဟုတ် တခြားတစ်ခုနဲ့အစားထိုက်လိုက်တာမျိုးတွေ ချက်ချင်းလုပ်တယ်တဲ့။

ရွေးကောက်ပွဲအတွက် ပြင်ဆင်မှုလုပ်ဖို့က ၆ လကနေ ၈ လ ဆိုရင်လုံလောက်တယ်တဲ့။ စာအုပ်မှာ စိတ်ဝင်စားစရာတေွနဲ့ အတွင်းကျကျလေးရေးထားတယ်။

P.S. Cambridge Analytica CEO ဖြစ်တဲ့ Alexander Nix ရဲ့ ဘိုးဘေးတွေက မြန်မာနိုင်ငံကို ကိုလိုနီလက်အောက်သွင်းခဲ့တဲ့ အရှေ့အိန္ဒိယကုမ္ပဏီရဲ့ ပိုင်ရှင်တွေဖြစ်တယ်တဲ့

./Team MrLinuxer